Sa usa ka panagtigom bahin sa Iligan Vision 2050, akong giangkon ang hagit ni Mayor Roy Ga nga motutok sa Pillar No. 11 – Pagpalambo sa Turismo, Kultura ug Tradisyon sa Iligan. Isip Champion sa Turismo, akong giangkon ang dakong responsibilidad sa paghimo og mga balaod nga mopasiugda sa kalamboan ug kaangayan sa atong turismo sa Iligan.

Ang una nakong buhaton mao ang pagsugyot og mga ordinansa nga magpaseguro og luwas ug accessible nga mga kalsada paingon sa atong mga key tourist destinations. Dili lalim ang biyahe sa atong mga bisita kung bati ang agianan. Ato kining pauswagon harun mas daghang turista ang mamisita ug makatagamtam sa kanindot sa Iligan.

Ikaduha, magpanday kita og mga balaod nga motabang sa local tourism businesses—sama sa mga tour operators, accommodation providers, ug uban pang nagserbisyo sa mga turista. Kinahanglan nato silang tabangan pinaagi sa tax incentives, teknikal nga suporta, ug promotion aron makabarog ug molungtad.

Usa sab ka dakong proyekto nga atong itukod mao ang pagtukod og centralized tourism guide system. Kini maglakip og online directory sa mga accredited establishments, visitor tracking features, ug platforms. Kini makatabang sa mga turista nga sayon ra maka-access sa mga impormasyon ug makatabang sa negosyo nga mas mailhan ug masuportahan.

Dili usab nato kalimtan ang pagpanalipod sa atong natural attractions sama sa Dodiongan Falls. Maghimo ta og mga ordinansa nga mopatuman og sustainable tourism practices, aron magpabilin kini nga limpyo ug maampingan para sa umaabot nga henerasyon.

Ug sa katapusan, atong suportahan ang community-based tourism—sama sa homestays, cultural performances, ug artisanal crafts. Sa ingon, tanang Iliganon makapahimulos sa kaayohan nga dala sa turismo, dili lang ang pipila. Ang turismo kinahanglan mahimong haligi sa inclusive growth.

Akong gidungog ang hagit ni Mayor Roy Ga, ug akong gisaaran ang katawhan nga akong gamiton ang akong katungdanan aron sa paglatid sa malinawong, malungtarong, ug malambuong turismo sa Iligan.