𝗣𝗮𝗵𝗮𝘆𝗮𝗴 𝗣𝗮𝗴𝘀𝘂𝗽𝗼𝗿𝘁𝗮 𝗻𝗶 𝗗𝗼𝗻𝗴𝗸𝗶 𝗕𝗮𝗹𝗹𝗲𝗿 𝘀𝗮 𝗜𝗹𝗶𝗴𝗮𝗻 𝗩𝗶𝘀𝗶𝗼𝗻 𝟮𝟬𝟱𝟬 𝗣𝗶𝗹𝗹𝗮𝗿 #𝟭𝟯: 𝗣𝗮𝗴𝗽𝗮𝘀𝗶𝘂𝗴𝗱𝗮 𝘀𝗮 𝗜𝗻𝗸𝗹𝘂𝘀𝗶𝗯𝗼 𝗻𝗴𝗮 𝗜𝗹𝗶𝗴𝗮𝗻

Kinasing-kasing kong gisuportaan ang Iligan Vision 2050 Pillar #13: Paghatag og Tukma nga Kahigayonan alang sa matag Iliganon, nga gihanyag ni Mayor Roy Ga.

Ang tinuod nga progresibong Iligan mao ang Iligan nga walay mabiyaan: tanan matagaan og pagtagad ug oportunidad. Diin tanan Iliganon, bisan unsa pa man ang ilang kagikan, ilang pagkatawo og sekswalidad, kahimtang sa ilang pamuyo, o abilidad, adunay patas nga ganghaan padulong sa kalamboan. Ang sektoral nga pagkamalungkopon nagpasabot sa paghatag og gahom ug pagdasig sa mga mamumuo, negosyante, kabatan-onan, kababayen-an, sa mga tawo nga anaay kabilinggan, ug ang komunidad sa mga Lumad para sila aktibo mupartisipar ug musalmot sa paghulma sa kaugmaon sa atong syudad.

Isip umaabot nga konsehal sa syudad, ako musaad nga akong iduso ang mga polisiya nga magpasiugda sa pagsiguro sa katarong sa pagpanarbaho, edukasyon, ug mga programa sa panginabuhi-an. Kinahanglang nato luspagon ang tanan nga babag, wagtangon ang diskriminasyon, ug magmugna og usa ka dakbayan diin ang kalampusan makita pinaagi sa kakugi ug potensyal—dili pribilehiyo.

Mag-uban ta! Magtukod kita og Iligan diin ang matag tingog madungog, matag lungsoranon mahatagan og bili, ug ang matag sektor molambo. Kini ang atong pangandoy, ug kini ang atong kab-oton.